Трагичниот биланс од ракетниот напад врз железничката станица во украинскиот град Краматорск во Доњецката Област се искачи на 57 луѓе, соопштија денеска локалните власти.

Гувернерот на областа, Павло Кириленко, рече дека во нападот во градот, кој е административен центар на Доњецката Област, се ранети и повредени уште 109 луѓе.

„Оние со полесни повреди беа пуштени дома, додека потешко повредените се транспортираат во безбедни области, каде им се укажува помош“, рече тој.

Ужасниот напад се случи додека илјадници луѓе, повеќето од нив жени и деца, на станицата чекале воз кон западна Украина.

Русија негираше дека нејзината војска е одговорна за нападот и сугерираше дека украинските сили стрелале врз сопствениот народ.