Претседателката на српскиот парламент, Ана Брнабиќ, денеска истакна дека студентите во блокада, со документ во кој се наведени условите за спроведување на изборите, покажале дека нивниот услов над сите услови е српскиот претседател Александар Вучиќ да не учествува на изборите, ниту пак да биде лидер или симбол на изборната листа, пренесува Еуроњуз.

„Коалицијата што губи на блокадата создаде документ со кој ќе ги утврди своите „црвени линии“ за учество на некои избори, некогаш. Број 1, услов над сите услови: Александар Вучиќ да не може да учествува на изборите“, изјави Брнабиќ на мрежата X.

Таа, исто така, истакна дека признанието на демонстрантите дека никогаш не можат да го победат Вучиќ е порелевантно од која било од лажните анкети што ги објавуваат преку своите медиуми со денови и недели.

„Овој дел од документот е уште посилен – името на претседателот на Република Србија, имено Александар Вучиќ, не смее да се споменува за време на кампањата, ниту неговиот лик да се прикажува некаде случајно, па дури ни да потсетува на некого кој ја држи таа позиција! Очите им се широко отворени од страв“, истакна Брнабиќ.

Во документот што Брнабиќ го објави на мрежата X се наведува дека претседателот мора да остане надвор од партиската кампања, односно дека неговото име и позиција не смеат да се користат за промоција на партии на парламентарни, покраински или локални избори и дека владата не смее да ги „злоупотребува државните институции за кампањата“.

Меѓу условите што ги наведува се и „реформирани избирачки списоци“, транспарентноста на работата на Републичката изборна комисија.

Ова се, како што наведуваат студентите во документот, кој го објави Брнабиќ – „услови“ за кои не може да се преговара и претставуваат „црвена линија“.