Британскиот суд во понеделник би можел да донесе конечна одлука за тоа дали основачот на Викиликс, Џулијан Асанж треба да биде екстрадиран во Соединетите држави поради масовното протекување на тајни американски документи, кулминација на 13 години правни битки и притвори, пренесува Ројтерс.

Двајца судии во Високиот суд во Лондон треба да донесат одлука дали судот е задоволен од гаранциите на САД дека Асанж (52) нема да се соочи со смртна казна и дека може да се потпре на правото на слобода на говор од Првиот амандман доколку се соочи со американско судење за шпионирање.

Адвокатскиот тим на Асанж вели дека тој би можел да биде во авион преку Атлантикот во рок од 24 часа по одлуката, би можел да биде ослободен од затвор или неговиот случај повторно може да биде заглавен во повеќемесечни правни битки.

„Имам чувство дека се може да се случи во оваа фаза“, рече неговата сопруга Стела минатата недела. „Џулијан би можел да биде екстрадиран или да биде ослободен“.

Таа рече дека нејзиниот сопруг се надева дека ќе биде на суд за клучното рочиште.

Викиликс објави стотици илјади доверливи американски воени документи за војните на Вашингтон во Авганистан и Ирак – најголемите безбедносни нарушувања од ваков вид во американската воена историја – заедно со делови од дипломатски телеграми.

Во април 2010 година објави тајно видео на кое се гледа американски хеликоптерски напад во 2007 година во кој загинаа десетина луѓе во ирачкиот главен град Багдад, вклучително и двајца вработени на Ројтерс.

Американските власти сакаат да му судат на Асанж, роден во Австралија, за 18 обвиненија, речиси сите според Законот за шпионажа, велејќи дека неговите постапки со Викиликс биле непромислени, ја оштетиле националната безбедност и ги загрозиле животите на агентите.

Неговите многубројни глобални поддржувачи го нарекуваат обвинителството травестија, напад врз новинарството и слободата на говорот и одмазда за предизвикување срам. Повиците за откажување на случајот варираат од групи за човекови права и некои медиумски тела, до австралискиот премиер Ентони Албанес и други политички лидери.