Британскиот нафтен гигант Шел заработува милијарда долари годишно тргувајќи со нафта во САД, покажаа документите приложени во тужбата поднесена од поранешен вработен.

Сведочењето на поранешниот шеф на одделот за трговија на Шел, Џон Димех во судот во Тексас даде ретка можност за увид во финансиските детали што Шел ги третира како деловна тајна, вклучувајќи огромни профити од тргување и мултимилионски бонуси за трговците.

Тој работеше 11 години во одделот за трговија со сурова нафта во Шел, во Хјустон, а минатата година рече дека тој оддел вообичаено заработува меѓу 950 милиони долари и една милијарда долари годишно.

Тоа е еднакво на 13 до 15 отсто од вкупниот профит на Шел пред оданочување во САД во изминатите години, според пресметките засновани на документите на компанијата.

Во даночниот извештај на Шел за 2022 година се наведува дека тие работеле во САД таа година со добивка пред оданочувањето од нешто повеќе од седум милијарди долари. Една година претходно таа изнесуваше околу 6,36 милијарди долари.

Портпаролот на Шел одби да коментира.

Британската нафтена компанија не ги објавува финансиските резултати на својот оддел за трговија со нафта и гас, кој го сметаат за најголем во светот. Сепак, недостатокот на информации загрижува некои инвеститори бидејќи бизнисот може да генерира големи профити, но и загуби.

Трговците заработуваат со купување и продавање нафта и гас во најповолна можност, што се дефинира со односот меѓу понудата и побарувачката. Нивната плата обично вклучува големи бонуси, па извршниот директор Ваел Саван минатата година добил бонус од 2,7 милиони фунти (3,15 милиони евра), наведува Ројтерс, цитирајќи деловен извештај.