Британскиот министер за финансии Џереми Хант планира да го удвои финансирањето на британскиот институт „Ален Тјуринг“, национална организација за наука за податоците и вештачката интелигенција.

Според очекувањата, Хант ќе претстави петгодишен инвестициски пакет вреден 100 милиони фунти или околу 117 милиони евра, пренесува „Гардијан“.

Дополнителните средства ќе бидат распределени во три области, а вештачката интелигенција се очекува да има важна улога во трансформирањето на здравството, заштитата на животната средина и зајакнувањето на одбраната и националната безбедност.

Откако дојде на министерската позиција во октомври 2022 година, Хант постојано повторуваше дека сака да ја претвори Велика Британија во суперсила во областа на науката, како и дека сака неговата земја да стане „следната Силиконска долина“.