Британската влада денеска го бранеше своето прифаќање на бегалците од Украина, по критиките дека не прави доволно и дека е далеку зад своите европски соседи во помагањето да се справи со најголемата хуманитарна криза од Втората светска војна, пишува Ројтерс.

Обединетите нации проценуваат дека повеќе од 1,5 милиони луѓе ја напуштиле Украина откако Русија почна да го бомбардира својот сосед, а стотици илјади досега заминаа во Полска, Романија, Словачка и на другите блиски земји.

Британската влада беше осудена од добротворните организации, опозициските пратеници, како и од Франција по нејзиното инсистирање дека бегалците прво треба да добијат виза за да влезат во Британија, што значи дека некои Украинци се заглавени во францускиот град Кале и не можат да влезат во ОК што предизвика нови дипломатски расправии.

Велика Британија објави план со визите за оние кои имаат семејство во земјата. Медиумите изминатиот викенд објавија дека Британија досега има издадено само околу 50 визи за Украинците.

„Мора да запомните дека пред две недели оваа ситуација воопшто не постоеше“, изјави министерот за Европа Џејмс Клеверли за Би-Би-Си. „Ние бараме да создадеме нешто во многу, многу големи размери, а тоа да биде извршено многу, многу брзо. Првично, се разбира, ќе биде побавно отколку што би сакале. Но, тоа ќе продолжи“.

Тој рече дека ќе има значително повеќе од пријавените 50 визи, но не може да каже колкави ќе бидат бројките.

„Ова е најголемата бегалска криза од Втората светска војна“, рече Клеверли. „Ова е проблем со која мислам дека малкумина од нас се навикнати да се справуваат“.

Министерката за внатрешни работи Прити Пател изјави за весникот „Сан“ дека сака да создаде хуманитарен пат што ќе му овозможи на секој од Украина да дојде во Британија, но Клеверли рече дека не очекува дека постоечките барања ќе се променат.

Европската унија се согласи да им даде привремен престој на Украинците кои бегаат од инвазијата и да им даде пристап до вработување, социјална помош и домување до три години.