Британската министерка за надворешни работи, Ивет Купер, изјави дека го предупредила Израел да не анектира делови од Западниот Брег како одговор на признавањето на палестинската државност од страна на Велика Британија.

На прашањето од Би-Би-Си дали се плаши дека Израел ќе ја искористи одлуката како изговор да анектира делови од Западниот Брег, Купер одговори дека јасно му ставила до знаење на својот израелски колега дека „тој и неговата влада не смеат да го прават ова“.

„Јасно ни беше дека оваа одлука што ја донесуваме е најдобриот начин да се обезбеди безбедноста на Израел, како и на Палестинците. Станува збор за заштита на мирот, правдата и, најважно, безбедноста на Блискиот Исток, и ние ќе продолжиме да работиме со сите во регионот за да го постигнеме ова“, рече Купер, објави денес британскиот јавен сервис.

Таа додаде дека екстремистите од двете страни се обидуваат да се откажат од секоја можност за решение со две држави, за кое Велика Британија верува дека има морална обврска да го врати во фокусот.

„Најлесно би било едноставно да се повлечеме и да кажеме дека е премногу тешко. Но, ние мислиме дека тоа е погрешно, бидејќи видовме толку многу уништување и страдање. Исто како што го признаваме Израел како држава, мора да ги признаеме и правата на Палестинците на нивната држава“, рече Купер.

Таа не прецизираше кога британскиот конзулат во Источен Ерусалим ќе стане амбасада, но рече дека дипломатските процеси со Палестинската самоуправа започнале.
Премиерот Сер Кир Стармер во неделата објави дека Велика Британија ќе ја признае Палестина како држава, приклучувајќи се кон Канада, Австралија и Португалија.
Израелскиот премиер Бенјамин Нетанјаху го осуди потегот, велејќи дека тоа е „огромен поттик за тероризмот“.

Претседателот на Палестинската самоуправа, Махмуд Абас, ја поздрави одлуката на Велика Британија, велејќи дека тоа ќе помогне во градењето на темелите за „држава Палестина што живее покрај Израел во безбедност, мир и добрососедски односи“.