Сите бремени жени да се вакцинираат со две дози мРНК-вакцина за да се заштитат себеси и плодот од компликации од ковид-19, препорачуваат гинеколози. И Комисијата за заразни болести препорача трудниците да примат две дози вакцина и да се вратат на работните места повикувајќи се на стручни мислења на домашни и светски здруженија.

Доктор Игор Алулоски од Клиниката за гинекологија и акушерство (ГАК) за „Слободен печат“ вели дека треба да се причека доколку станува збор за рана бременост.

– Нема дискусија дека бремените жени треба да се вакцинираат против ковид-19. Доколку станува збор за рана бременост, пожелно е да се почека по 14-тата недела. На ГАК породивме голем број позитивни на вирусот. Начелно, во периодот на бременоста организмот има послаб имун одговор. Со сојот омикрон пациентките се со полесна клиничка слика или асимптоматски, но со делта одреден број пациентки беа кислородно зависни. Најголем дел по завршувањето на бременоста, ги препраќавме на домашно лекување со препорака да се јават на Инфективната клиника – вели Алулоски.

За жал, од почетокот на пандемијата имало и такви што починале при породувањето како последица и компликации од ковид-19.

– Важно е да се знае дека нема директна трансмисија на ковид-19 од мајката на детето за време на породувањето. Ризик од пренос од мајката на детето постои подоцна, при контакт по раѓањето. Ние како клиника до Лекарската комора дадовме мислење кое беше презентирано од стручниот колегиум во врска со вакцинацијата на бремените жени. Главно, повикот е да се вакцинираат. Колкав е одѕивот – не знам, но мислам дека е мал. Позитивните пациентки што во моментов се на клиниката, во добар дел не се вакцинирани – вели Алулоски.

Специјалистот по гинекологија и акушерство доктор Ненад Лазаров вели дека сите светски асоцијации во областа на гинекологијата и акушерството препорачуваат во кој било период од бременоста да се прими вакцината.

– Што порано, тоа подобро. На запад, во Франција, Германија, жените се вакцинираат и одат на работа. Ризикот е минимален, и тоа за предвремено раѓање, но ова е неконклузивно. Не можеме да кажеме дали предвременото раѓање се случило само од себе или како резултат на вакцината. Штета по плодот и фетусот нема. Од друга страна, ако бремена жена се зарази, тогаш ризиците за компликации се засилени зашто е поподложна на инфекции. Има докажано зголемен ризик од предвремено пораѓање и губење на бременоста. Не е честа појава, ама ризикот постои. Лично, не препорачувам вакцинација на бремени жени ако прележале ковид-19 пред шест до девет месеци, зашто се смета дека имаат стабилен имунитет и не е неопходно да се вакцинираат – објасни Лазаров за „Слободен печат“.

Во препораките за вакцинација на бремени жени од стручниот колегиум на ГАК, од Комитетот за безбедно мајчинство и Здружението на перинатолози, се вели дека вакцинацијата во бременоста се препорачува како најдобар начин на заштита од штетните ефекти на ковид-19 во бременоста како предвремено породување и престојот во единицата за интензивна нега на новороденчето и намалување на ризикот од спонтан абортус. Пред вакцинацијата, трудницата треба да се консултира со матичниот гинеколог за староста на плодот и индивидуалните ризици кај трудницата. Таму се додава дека досега не се пронајдени штетни состојки во вакцините што може да ѝ наштетат на трудницата и на развојот на нејзиниот плод, ниту да предизвикаат акутна ковид-инфекција.