Лина Ѓорческа триумфираше на турнирот W50 во романскиот град Слобозија што се играше за награден фонд од 40.000 долари. Македонската тенисерка во финалето ја совлада домашната тенисерка Елена Бертеа со 2-1 во сетови за 2 часа и 15 минути игра.

Во првиот сет до резултатот 3:3 во гемови немаше брејк, а потоа домашната тенисерка со два брејка го освои сетот и поведе со 1-0 во сетови. Во вториот сет Бертеа водеше со 3:1 во гемови, но тука почнува пресвртот на Лина Ѓорческа која освои пет гема во низа и го доби сетот со 6:3 во гемови и изедначи на 1-1 во сетови.

Во решавачкиот сет македонската тенисерка поведе со 4:2, но Бертеа изедначи на 4:4. Сепак Ѓорческа успеа да ги добие следните два гема и го доби сетот со 6:4 за конечни 2-1 во сетови.

Ова за Ѓорческа е вкупно 15.та титула во поединечна конкуренција, а го играше 39.то финале. Македонската тенисерка има и 47 титули во конкуренција на двојки.

Првата турнирска победа ја имаше на турнир во Куршумлијска Бања, а ова и беше трето финале во низа на последните три турнири на кои претходните два финални меча ги загуби.

За победата на турнирот во Слобозија, Ѓорческа освои 50 поени и ќе напредува на ВТА листата. Ѓорческа следната недела ја очекува настап на турнир во Букурешт.