Браќата Тејт пристигнаа на Флорида, гувернерот ДеСантис им порача дека не се добредојдени
Браќата Ендру и Тристан Тејт, кои денеска со приватен авион ја напуштија Романија, каде се обвинети за трговија со луѓе и силување, слетаа во Форт Лодердејл, Флорида, рече портпаролката на браќата, Матеа Петреску, според „Си-ен-ен“.
Препорачано
„Ние сме невини додека не се докаже вината“, рече Ендру Тејт откако слета во САД.
На браќата Тејт, кои имаат двојно американско и британско државјанство, претходно им беше забрането да ја напуштат Романија откако беа уапсени во 2022 година и обвинети за силување, трговија со луѓе, перење пари и основање организирана криминална група. Тие ги негираат сите обвиненија.
Нивниот адвокат Јоан Глига изјави дека браќата ја напуштиле Романија во четвртокот наутро и полетале за Флорида.
„Забраната за патување повеќе не важи… Обвинителот на барање на адвокатот ја смени содржината на претходно изречените мерки“, рече Глига.
Гувернерот на Флорида, Рон ДеСантис, на прес-конференција во четвртокот рече дека браќата Тејт не се добредојдени во Флорида.
„Флорида не е место каде што сте добредојдени со вакво однесување. Нашиот јавен обвинител, Џејмс Утмајер, истражува со какви правни ситуации ќе се соочиме како резултат на ова“, рече ДеСантис, додавајќи дека не знаел оти двајцата обвинети ќе дојдат на Флорида и дека за нивното пристигнување дознал преку медиумите.
Одлуката на романските власти да ја укинат забраната дојде откако, наводно, САД извршиле жесток притисок врз Букурешт да ги олесни ограничувањата за браќата Тејт, кои имаат силна поддршка на десничарските социјални медиуми и кои неуморно го поддржуваа актуелниот американски претседател Доналд Трамп за време на изборната кампања во САД.
Притисокот, според „Фајненшал тајмс“, го „испорачал“ специјалниот пратеник на Трамп Ричард Гренел, кога се сретна со романскиот министер за надворешни работи Емил Хурезеану на Минхенската безбедносна конференција овој месец.
Браќата ги бара и полицијата во Обединетото Кралство под обвинение за силување и трговија со луѓе, што тие исто така негираат. Нивната екстрадиција во Обединетото Кралство треба да биде решена по завршување на случајот во Романија.
