Во полициската станица во босанскиот град Цазин на границата со Хрватска, вчера 34-годишна вработена во кафулето „Текила“ пријавила две лица што ѝ се заканувале и ја нападнале, јавуваaт локалните медиуми.

Како што изјавила сопственичката на локалот, З.Е. (46), двајца помлади мажи пиеле алкохол и кога требало да платат, влегле во расправија со келнерката, А.М..

Но, откако вербално ѝ се нафрлиле, двајцата почнале и физички да ја напаѓаат, по што таа од чантата извадила спреј-солзавец, кој го употребила за самоодбрана, велат од полицијата. Келнерката потоа зела дрвена палка и почнала да ги удира двајцата дрски муштерии, а тие избегале.

Кратко потоа дошла полицијата и по десетминутна потера ги нашла двајцата млади мажи, по што биле уапсени и против нив ќе бидат поднесени прекршочни пријави. Поради повредите предизвикани од ударите со палката, им било понудено да бидат пренесени во Здравствениот дом Цазин, но тие одбиле, веројатно срамејќи се што ги совладала и ги понижила жена, пишуваат медиумите.