Лутата храна може да го забрза метаболизмот, но во одредени случаи делува како „бомба во стомакот“. Според итниот лекар д-р Алан Капин од Клиниката Кливленд, кај некои луѓе лутите пиперки може да предизвикаат нагло покачување на крвниот притисок, забрзано чукање на срцето, стеснување на крвните садови и зголемен ризик од срцев удар. Особено ранливи се лицата со постоечки срцеви заболувања, како вродени мани или зголемено срце (кардиомегалија), пишува „Е-клиника“.

Што е капсаицинот?

Предупредувањето на д-р Капин доаѓа поради вирално видео од Источен Лондон, каде што младо момче колабираше по само еден залак од „најлутиот кари во светот“. Причината – екстремно висока концентрација на капсаицин, активната состојка која ја дава лутината на пиперките. Иако капсаицинот има силни антиинфламаторни својства и се користи за намалување на болки, тој исто така може да го иритира желудникот, да го зголеми притисокот и да предизвика сериозни срцеви проблеми.

Пред две години, 14-годишниот Харис Волобах починал по јадење наводно најлут чипс на светот, како дел од предизвик на социјалните мрежи. Обдукцијата открила дека имал основно срцево заболување, кое се влошило поради големото количество капсаицин.

Неправилен ритам на срцето по лут оброк

Кардиологот д-р Џејмс Уделсон смета дека после лут оброк може да дојде до силна циркулација и неправилен срцев ритам.

„Постојат документирани случаи на акутна токсичност од капсаицин што довела до исхемија на срцевиот мускул“, вели д-р Уделсон.

Не реагираат сите исто

Стручњаците сè уште не можат со сигурност да утврдат која доза капсаицин предизвикува бурна реакција, бидејќи секој организам различно ја поднесува оваа состојка.

Лутата храна се рангира според Сковиловата скала. На пример, пепер икс е најлута пиперка на светот со речиси 2,7 милиони поени, додека халапењо има околу 5.000. Иако нема прецизна граница на скалата што означува опасност, познато е дека пиперките од врвот на листата често предизвикуваат проблеми со варењето, киселински рефлукс, па дури и срцеви проблеми. Забележани се и случаи на хоспитализација по консумирање на четири силно лути чили пиперки.

Варење, киселина, па дури и рак

Општата препорака е да се избегнуваат индустриските лути сосови кои се рекламираат како „најлути на светот“.

Д-р Дуeјн Мелор, диететичар од Универзитетот Астон во Бирмингем, предупредува дека лутата храна, особено чили пиперките, може да предизвика проблеми со варењето и во екстремни случаи да го зголеми ризикот од рак. Познато е дека лутата храна предизвикува рефлукс, кога желудочната киселина се враќа во хранопроводникот, што често предизвикува горушица.

„Ако ова трае подолго време, може да дојде до промени во хранопроводникот и зголемен ризик од рак“, вели д-р Мелор.

Студија од 2022 година наведува дека високата консумација на зачинета храна може кај некои лица да го зголеми ризикот од рак на хранопроводник. Сепак, се посочува дека се потребни дополнителни истражувања за да се потврди оваа поврзаност.