Поранешниот бразилски претседател Жаир Болсонаро е хоспитализиран во главниот град Бразилија во вторникот откако одеднаш се почувствувал лошо.

Неговиот син, Флавио, во објава на Икс напиша дека Болсонаро постојано ика, повраќа и има низок крвен притисок.

Во неделата, тој беше подложен на операција за отстранување на кожни лезии.

Болсонаро се соочува со сериозни здравствени проблеми, особено откако беше избоден во стомакот за време на изборната кампања во 2018 година. Оттогаш, тој претрпе најмалку шест операции, од кои последната во април, која траеше речиси 12 часа.

Минатата недела, поранешниот претседател на Бразил беше осуден од Врховниот суд на 27 години и три месеци затвор за обид за државен удар по неговиот пораз на изборите во 2022 година.

Адвокатите на одбраната планираат да ги исцрпат сите „правни лекови“ што им се на располагање за да ја поништат одлуката. Дотогаш, 70-годишниот Болсонаро ќе остане во домашен притвор.