Бојан Христовски: Со полиграф ќе расветлуваме злоупотреби во АНБ, од асистентското место за жал морам да се откажам
Директорот на Агенцијата за национална безбедност Бојан Христовски за „Слободен печат“ вели дека се откажал од асистентското место на Факултетот за безбедност за кое беше избран, поради ангажираност и посветеност на безбедносните процеси во агенцијата со која раководи.
Препорачано
Тој беше избран за асистент по криминалистички науки пред две недели, меѓутоа со оглед на тоа што веќе има работна позиција во мирување во МВР, како и поради тоа што е именуван за директор на АНБ од страна на Владата – одлучил дека нема да го прифати асистентското место.
-Се заблагодарувам на професорите од наставно-научниот совет и на членовите на рецензентската комисија за дадената поддршка, но ќе морам да ја пропуштам оваа можност за асистент, бидејќи сум целосно посветен на реформите и работата во АНБ. Има многу професори на Факултетот за безбедност кои ме поддржуваат и дел од нив ме повикаа да аплицирам на конкурсот за асистент и ми даваа поддршка. Но, поради сите околности со мене, поради директорската функција во АНБ која бара голема посветеност, реформите ќе траат и се решив да не ја прифатам таа можност. Можам да ви откријам дека има индиции дека се правени бројни злоупотреби во АНБ, поради што внатрешната контрола на АНБ ќе функционира многу активно во наредниот период и сум ангажиран околу тоа. Во тој контекст, правиме анализа на пазарот за набавка на полиграф кој ќе биде користен и во процесот на внатрешната контрола. А во меѓувреме, АНБ и Министерството за внатрешни работи ќе склучат меморандум за соработка за ова. Бидејќи МВР има полиграф а нема полиграфист, а ние имаме полиграфист а немаме полиграф. Со меморандумот МВР ќе може да го користи нашиот полиграфист, а ние ќе можеме да го користиме нивниот полиграф додека се направи набавката, изјави за „Слободен печат“ Христовски.
Деканот на Факултетот за безбедност, професор доктор Јонче Ивановски за „Слободен печат“ вели дека согласноста за вработувањето на Христовски на Факултетот за безбедност која ја добиле од Министерството за финансии, формално ќе истече на 31 декември, што фактички ќе значи дека Факултетот ќе загуби едно асистентско место.
-Оваа година, добивме четири согласности од Министерството за финансии за вработување после 12 години. Годинава успеавме да вработиме двајца доценти и еден асистент, што е добро во поглед на подмладување на Факултетот со оглед на тоа што поради природниот одлив, професори си заминаа во пензија – ни рече професор доктор Ивановски.
Изборот на Христовски за асистент по криминалистички науки се случи на конкурс, а имаше и еден приговор од кандидатката Маријана Јаковлеска. Таа се жалеше дека англискиот сертификат на Христовски за положен ТОЕФЛ (Test of English as a foreign language) наводно бил „истечен“, а нејзиниот не бил.
Петтиот кандидат (Бојан Христовски н.з.) има доставено Уверение за познавање на англиски јазик ТОЕФЛ со 75 бода од 26.03.2022 година, Language School Julia Co. LTD, Пловдив Бугарија. Потенцирам дека валидноста на ТОЕФЛ тестовите, односно нивната важност е две години, по што тестот треба да се повтори, што може да се провери на официјалната страна на ТОЕФЛ, приговараше Јаковлеска.
Но, рецензентската комисија не го прифати ова, а наставно-научниот совет го одбра Христовски за асистент.
На веб-страницата на Британски совет е објавена истата и пишува дека „за нивоата Б1 и Б2 треба поседување на меѓународно признаен сертификат издаден од официјален европски тестатор со најмалку 60 бодови за ТОЕФЛ iБТ“. Според приложеното уверение кандидатот м-р Бојан Христовски за познавање на англиски јазик доставил ТОЕФЛ iBT со 75 бода, што е повисок степен од бараното ниво на Б1. Комисијата направи пребарување за валидација за резултати, и врз основа на табелата може да се констатира дека B2 Upper intermediate за ТОЕФЛ iBT е со скала од 72-94 бода. Според оваа скала е уверението на м-р Бојан Христовски каде се наведени 75 бода и одговара на Б2, ниво што е повисоко од Б1. Затоа му беше прифатен сертификатот, наведоа оттаму во одговор на приговорот.
Државната комисија за спречување на корупцијата вчера на седница утврди дека Христовски е именуван за директор на АНБ со исполнување на сите предвидени услови кои ги налага членот 10 од Законот за Агенцијата за национална безбедност. Предметот за Христовски во Антикорупциска беше отворен по поднесена претставка од анонимни пријавители кои осум пати ја дополнувале истата.
Во неа го спореле неговиот ТОЕФЛ сертификат од Пловдив Бугарија, дипломата од економскиот факултет во Универзитетот „Скопје“, искуството на раководни позиции, поранешната партиска функција што ја извршувал во ВМРО-ДПМНЕ до минатата година итн. Сите услови до еден – директорот Христовски ги исполнува и неговото именување е законско, сметаат антикорупционерите. Доставил изјава дека во ВМРО-ДПМНЕ повеќе не членува, а просветна инспекција влегла на Универзитетот „Скопје“ да му ја провери дипломата од Економскиот факултет и не биле констатирани никакви неправилности. Во Јавното обвинителство имало кривична пријава за сертификатот по англиски за Христовски и таа е адресата која антикорупционерите ја посочија за расветлување на овој аспект бидејќи за нив сертификатот на Христовски за англиски формално-правно ги исполнува условите за јазична компетенција.
-Документот важи сè додека не е докажано спротивно од надлежен орган. Исходот од постапката пред Јавното обвинителство е во надлежност само на Обвинителството и процесуирањето на евентуално обвиниение е во надлежност на судот. ДКСК не може да прејудицира исход на оваа постапка поради тоа што постои презумпцијата на невиност, рече членката на ДКСК Цвета Ристовска.
Премиерот Христијан Мицкоски веќе најави дека го поддржува планот да се спојат Агенцијата за национална безбедност со Агенцијата за разузнавање и ова го оправда на начин што „дел од нашите НАТО сојузници веќе ја имаат спроведено таквата реформа“. Но, нацрт-законот за спојување на АНБ и АР кој се подготвува, уште не е достапен на јавноста и во верзијата во која што се наоѓа – е класифициран. Мицкоски од собраниска говорница им префрли на пратениците од опозицијата што како што рече – од страна на АНБ бил следен со дронови, додека бил лидер на опозицијата.
-Се дигале дронови над мојата куќа, кога сум одел на терен во Прилеп. И тоа е сè во белешките на службите кои треба да разузнаваат и контраразузнаваат. Го разузнавале претседателот на опозицијата со оперативни дронови и оперативно-технички средства. Нормално е тоа? И сега се уплашени и од свиркачи добиваат информации, за сето тоа што мора да има одговорност. Сето тоа ќе биде презентирано на затворена седница и сето тоа да се декласифицира. Вие го следевте лидерот на опозицијата со дронови, а сега пишувате анонимни писма. Колку сакаат нека пишуваат, нема спас. Не им бега одговорност, рече Мицкоски.
Опозицијата пак, жестоко се противи на најавеното спојување, поради како што велат, концентрацијата на моќ што на таков начин ќе се направи.
– Самата најава на директорот на АНБ неодамна на Фејсбук, дека ова ќе биде последниот роденден на Агенцијата за национална безбедност, укажува на фактот дека ќе се оди кон укинување на службите, односно спојување и формирање на нова служба. Тоа сега никој не го бара од Македонија, затоа што веќе претходно се направи реформата. Со овој процес, дополнително се праќа пораката на сите вработени и во АНБ и во АР, ’или ќе се построите во текот на реформата или ќе имате проблеми во однос на селектирањето коешто ќе се прави во новата агенција‘. Ова создава една неизвесност и место тие луѓе да се ангажираат и да работат за државата, тие повеќе ќе мислат каде ќе биде нивниот статус во наредниот период – рече поранешниот министер за внатрешни работи и пратеник во Собранието, Оливер Спасовски.
