Македонскиот кошаркар Ненад Димитријевиќ има одлична сезона во дресот на Уникс Казан со кој денес стигна до шампионската титула во ВТБ лигата.

До титулата Уникс стигна со победата од 4:1 против Локомотив Кубан, а токму во петтиот натпревар Димитријевиќ одигра фантастично постигнувајќи 34 поени. Одличен беше Нено и во претходните натпревари, па заслужено беше прогласен и за МВП во плеј-офот најсилната руска лига.

Вкупно во доигрувањето за Уникс Димитријевиќ одигра 15 натпревари и оствари просек од 15.8 поени, 5.3 скокови, 3.2 асистенции и 1.2 украдени топки по натпревар.

За Димитријевиќ ова е прв трофеј во сениорската кариера, а во рускиот тим настапува како позајмен играч од Валенсија. За очекување е по една ваква одлична сезона во Русија за Димитријевиќ да постои голем интерес од европските клубови.