Судот по барање на јавното обвинителство, му определи осумдневен притвор на хирургот што се товари за примање поткуп од Битолската клиничка болница, потврдија за „Слободен печат“ од обвинителството.

Оваа мерка за него била потребна поради опасност дека може да избега.

Според обвинението, тој на 27 јануари, како лице кои вршело работи од јавен интерес, односно како доктор – хирург на Одделението за хирургија при ЈЗУ Клиничка болница „Д-р Трифун Пановски“ Битола, извршил интервенција – операција на жолчно ќесе врз пациентка, а потоа индиректно, преку сведок, побарал од синот на пациентката да му даде пари во износ од 150 евра за да се почастел за извршената работа. Синот следниот ден во просториите на болницата, во плик му дал на осомничениот три банкноти од по 50 евра. Откако осомничениот ги примил, му бил извршен претрес и овластени службени лица од СВР Битола ги пронашле и одзеле парите.