Уапсен е 42-годишен битолчанец, осомничен за изнуда. Тој првин побарал пари од бизнисмен под изговор дека станува збор за донација, а потоа продолжил со закани дека ќе ги нападне или убие него и неговото семејство, соопшти Основното јавно обвинителство во Битола.

„Осомничениот во повеќе наврати испраќал пораки и закани преку социјални мрежи, СМС и гласовни пораки. На крајот побарал 2.000 евра од оштетениот, наводно за одмор за своите внуци“, соопшти Обвинителството.

Жртвата го пријавила случајот во полиција, па се подготвил план за контролирана испорака на парите.

„При договорената средба во деловните простории на оштетениот, осомничениот ги примил парите кои претходно беа крим-технички обработени. Веднаш потоа беше претресен и лишен од слобода, а парите беа пронајдени кај него“, се вели во соопштението.

Од Обвинителството нагласуваат дека ова е прва целосно реализирана оперативна акција на новоформираниот Истражен центар на ОЈО Битола, кој со работа започна на 1 август годинава.

„Јавниот обвинител веќе достави предлог за определување мерка притвор за осомничениот“, информираат од институцијата.