Согласно Законот за финансиска поддршка, креирани се над 5.000 изворни работни места од домашните компании, кои ќе продолжат да инвестираат и во наредните години. Државата даде поддршка на 919 компании во изминативе шест години со околу 100 милиони евра, а тие компании инвестирале речиси половина милијарда евра, изјави вицепремиерот за економски прашања Фатмир Битиќи на конференцијата „Година на европски можности“, говорејќи за државната помош за домашните компании.

Ова е структурна промена која ја правиме, вклучување на домашните компании во производството, како еден сектор кој треба да е носечки, рече Битиќи.

Вицепремиерот додаде дека до 2017 година домашните компании немаа никаква поддршка од државата и се фаворизираа само странските инвестиции.

Според него, структурните промени почнале да се случуваат во 2017 година со заминување на режимот.

Структурните промени, дали се во економија или кој било сектор не може да се случат краткорочно, не може да се случат за една година. Структурните промени почнаа да се случуваат од 2017 година, кога се презеде власта од претходниот режим, кој реално имаше заборавено што треба структурно да се работи на економијата и одржливоста, а уште повеќе имаше заборавено на зборот конкурентност, наспроти регионалниот и глобалниот пазар, рече вицепремиерот за економски прашања.

Одобрување на Планот за економски раст,  Битиќи вели дека значеше една клучна работа – изедначување на поддршката за домашните и странските инвеститори.

Поддршката кон домашната економија на почетокот на 2017 година беше нула, имаше нула поддршка за домашните компании. Не можеше да се најде ниту една домашна компанија поддржана од Владата, рече Битиќи.

Вицепремиерот додаде дека тогаш се донесе Законот за финансиска поддршка на инвестиции, а до денес веќе има 919 домашни компании кои се поддржани.

Компании кои инвестираат во станување поконкурентни и инвестираат во човечкиот кадар. Сите тие 919 компании во овие шест години беа поддржани со 100 милиони евра, буџетски средства, за да направат инвестиции од половина милијарда евра, заклучи тој.