Во овие етири години работевме за покачување на пензиите и за платите и на новата пресметка на истите кои гарантираат зголемување секоја година, без политичко пазарење. И во тоа успеавме, затоа што истовремено ги јакневме и домашните компании. Од целосно заборавени со нула исплатена финасиска поддршка кон нив, ние ги поддржавме со 100 милиони евра. А денеска кажувам, во следните 4 години, домашните компании ќе ги поддржиме со 180 милиони евра, рече вицепремиерот за економски прашања и коносител на листата во ИЕ2, Фатмир Битиќи на промоцијата на програмата на СДСМ, „Програма за европска иднина“.

Тој кажа дека ова е дуплирање на финанската поддршка кон домашните компании од претходниот мандат и дека заедно со нив ќе продолжи да јакне домашната економија, со јавни инвестиции од 3,5 милиони евра.

– Дел од нив, секако вложени и во праведна енергетска транзиција, стабилност и енергетска независност. Домашното производство на електрична енергија ќе го зголемиме за 70 отсто. Домашно производство од гас, чисти и обновливи извори. Кое никако, ама никако нема да биде од штетните мали хидроцентрали. За нив велиме засекогаш не, како и за сите фосилни технологии кои ни го загадуваат воздухот и почвата – рече Битиќи.

Вицепремиерот додаде дека во новата програма на СДСМ исто така се работи и на целосно дигитализирани јавни услуги, затоа што само со навремена и успешна дигитализација може да се постигне посакуваниот развој.

– Во овој мандат, ќе ја воведеме електронската лична карта  МК-еИД (македонска елентронска ај ди карта). Со неа ќе се намалат бирократските пречки. Граѓаните и граѓанките ќе добијат заштитени и дигитализирани лични податоци – рече Битиќи.

И тој најави дека до 2028 година просечната плата ќе изнесува 1.100 евра, а минималната ќе достигне 600 евра.

– За ова да го постигнеме, нема да го преоптовариме бизнисот. Затоа велиме, 0 отсто данок на личен доход за минимална плата. Ова ќе донесе достоинствен стандард за граѓаните, ќе ја зголеми продуктивноста, но истовремено ќе ја намали и сивата економија – рече Битиќи.

Тој додаде дека со влезот во ЕУ, просечната плата ќе порасне на 1300 евра, додека минималната ќе се искачи на 800.

– Добро платени, задоволни работници, кои ќе имаат европски стандард, дома. За тоа работиме, тоа ни е задача и таа ќе ја исполниме. Заедно со, досега најниска невработеност од 7  отсто до 2028 година – рече Битиќи.

Вицепремиерот додаде дека во следните четири години СДСМ ќе работи и ќе сработи за економија која се потпира на четири столба – човечки капитал, висока продуктивност, конкурентсно и иновативност.