Согласно Законот за буџети ние како членови на Фискалниот совет имаме понепријатна улога да укажеме на ризиците кои постојат на меѓународно ниво и во нашата земја, истакна Глигор Бишев, претседател на Фискалниот совет пред пратениците на собраниската Комисија за финансирање и буџет пред почетокот на општата расправа за Буџетот за 2025 година. Тој се извини дека доцна го добиле Предлог-Буџетот, па затоа ова е прво укажување на ризиците кои може да се заканат на успешните проекции на Министерството за финансии.

-И Буџетот за 2024-та, но и овој за 2025-та го темелат растот врз база на домашната потрошувачка, но мора да се каже дека нето извозот за оваа година е значително негативен, а во 2025-та се приближува до нула. Веќе видовме дека во септемрви нашата инфлација почна да се забрзува, а во овој период и домашните фактори почнаа да даваат придонес кон зголемувањето на цените. Фискалната политика за 2025 исто така се базира на раст на буџетските расходи, а претпоставка на Министерството за финансии е дека тој ќе влијае врз домашниот раст, но исто така ќе има и притисок врз инфлацијата и тоа мора да е земе предвид. Ние гледаме дека догодина ќе има дополнителен раст на пензиите што ќе доведе до раст на личната потрошувачка, а тоа мора да го имаме предвид. Исто така нема да одиме со раст на извозот, оти Германија е во криза, што значи дека се ќе се базира врз домашниот раст. Тоа се предизвиците за кои ние мора да имаме предвид при креирање на фискалната политика. Затоа препорачуваме непотрошените средства за инвестиции да не се пренаменуваат за тековни расходи, туку да се заштедат, како што постои во некои земји во светот. Втората препорака е буџетските расходи да не растат со повисока стапка од растот БДП, а бидејќи годинава имаше голем прогрес на контролата на буџетскиот дефицит, добро е тоа да продолжи и в година и да нема отстапувања – подвлече Бишев.