Биро за јавни набавки: ЈСП избрало неприфатлива понуда за набавка на гориво
Бирото за јавни набавки постапува професионално, без оглед на дневните политички препукувања, а наместо да шири политикантство, Градот Скопје навремено треба да реагира и да ги искористи законските можности кои му стојат на располагање да се задоволат итните потреби за гориво до завршување на редовната постапка. За секој проблем има решение, само што Градот треба да има волја и знаење да го најде, наместо да бара дежурни виновници кај другите за проблемите кои самиот ги создава – додаваат од Бирото
Јавното сообраќајно претпријатие – Скопје избрало неприфатлива понуда за набавка на гориво како најприфатлива. Како што појаснуваат од Бирото за јавни набавки, постапката за набавка на Еуродизел, објавена од ЈСП била предмет на управна контрола, при што било констатирано станува збор за неприфатлива понуда, а прептријатието и покрај јасните инструкции не ја искористило можноста ниту да ја оспори одлуката.
Препорачано
-
1
-
2
-
3
Од Бирото велат дека при управната контрола констатирано е дека оваа понуда, која била и единствена поднесена понуда во постапката, не исполнува услов кој самиот ЈСП го навел во точка 1.4.8 од тендерската документација. Тоа, како што се додава во соопштението, всушност е наведено и во самиот извештај од спроведена постапка на комисијата за јавна набавка во ЈСП.
Скопје без јавен превоз, граѓаните преку социјалните мрежи се организираат за превоз
-Управната контрола, имајќи го тоа предвид, дала јасни инструкции што треба да преземе ЈСП во записникот од спроведена управна контрола. Имено, со оглед на тоа што ЈСП направил избор на неприфатлива понуда, а други понуди немало во постапката, дала инструкции комисијата за јавна набавка да ја стави вон сила донесената одлука за избор и да донесе одлука за поништување на постапката. Таквите инструкции се согласно член 177 став 3 од законот. Напоменуваме дека ЈСП не ја искористил ниту можноста да ги оспори инструкциите на Бирото преку механизмите што му стојат на располагање во законот, од едноставна причина што станува збор за правилно утврдена фактичка состојба од страна на Бирото и исход на постапката кој не може да биде поинаков, а да биде согласно со законот – се вели во соопштението од Бирото.
Инаку, согласно Законот за јавни набавки, од Бирото појаснуваат дека сите јавни набавки во вредност од над 500.000 евра, како што е набавката на ЈСП, се предмет на управна контрола без оглед на тоа кој договорен орган ги спроведува.
-Ставовите искажани во денешното соопштение од Градот Скопје со кои се прави обид фокусот од лошо спроведената постапка да се прекрие со клевети од типот „кадарот на шефот на ВМРО во Бирото за јавни набавки” во целост ги отфрламе како непримерни и непрофесионални. Бирото за јавни набавки постапува професионално, без оглед на дневните политички препукувања, а наместо да шири политикантство, Градот Скопје навремено треба да реагира и да ги искористи законските можности кои му стојат на располагање да се задоволат итните потреби за гориво до завршување на редовната постапка. За секој проблем има решение, само што Градот треба да има волја и знаење да го најде, наместо да бара дежурни виновници кај другите за проблемите кои самиот ги создава – додаваат од Бирото.
Од вчера попладне, главниот град е без јавен превоз затоа што прептријатието нема нафта. Сообраќаат само 25 автобуси на гас, додека останатите се паркирани во базите на ЈСП „Скопје“ во Автокоманда и Ѓорче Петров.
Граѓаните преку социјалните мрежи се организираат за превоз и апелираат до сите кои одат на работа со сопствено возило да застанат на најблиската автобуска станица и да прашаат студенти, пензионери дали има некој да превезат до попатната дестинација.
Вработените во ЈСП „Скопје“ велат дека претпријатието има долг кон снабдувачот „Пуцко Петрол“, но тоа како што тврдат е само една од вистините, а другата е кој и како да го снабдува ЈСП со нафта затоа што договорот со „Пуцко Петрол“ истекува, односно како што велат се работи за „тендерски дубари и политика“.
Од Град Скопје вчера испратија соопштение во кое велат дека повторно ВМРО-ДПМНЕ креира криза и го остава ЈСП без нафта.
– Нова криза со која го остава ЈСП без нафта, а скопјани без јавен превоз како смислено сценарио за урнисување на претпријатието. Кадарот на шефот на ВМРО ДПМНЕ во Бирото за јавни набавки Маре Богева, креира криза во ЈСП за гориво, со тоа што за прв пат од постоењето на претпријатието ја поништи редовната јавна набавка за гориво во ЈСП како смислено сценарио. Во исто време и со истото смислено сценарио приватните превозници, кои скоро воопшто не сообраќаат поради револт за неразгледување на нивната иницијатива за зголемување на цената по која возат, денес менуваат изјава дека не им биле верификувани извештаи за возење, а кој ќе им ги верификува кога не возат – велат од Град Скопје.
Оттаму додаваат дека за одлука за зголемување на цена на приватниците може да расправа и да донесе одлука единствено Советот на Град Скопје, предводен од Трајко Славевски од ВМРО ДПМНЕ и Мицковистите.
Славески синоќа објави дека е закажа седница на Советот за денеска во 18 часот.
-Нефункционирањето на јавните претпријатија во надлежност на град Скопје, задолжени да обезбедуваат витални услуги за граѓаните, достигна кулминација. Совет на град Скопје утре, 21 ноември, ќе одржи итна вонредна седница со почеток во 18:00 часот. Советот, во рамките на своите надлежности, е подготвен низ конструктивна расправа да усвои заклучоци со кои ќе побара од надлежните, пред сè од градоначалникот Арсовска и директорите, итно да го нормализираат јавниот превоз на територијата на град Скопје и да го подигнат нивото на хигиена – сподели Славески преку социјалните мрежи.
