Советот на министри на Босна и Херцеговина денес едногласно ја усвои Агендата за реформи, што беше еден од предусловите за земјата да добие средства од Планот за раст на Европската унија за Западен Балкан, пренесе Данас.

На телефонска седница на Советот на министри беше постигнат консензус, потврди министерот на БиХ за човекови права и бегалци, Севлид Хиртиќ.

Усвојувањето на Агендата за реформи до 30 септември беше предуслов за БиХ да добие средства од Планот за раст на ЕУ за Западен Балкан.

Ова значи дека БиХ нема да изгуби дополнителни приближно 100 милиони евра од Фондот, што за БиХ првично изнесуваше близу милијарда евра.

Претходно, БиХ изгуби 108 милиони евра во јули бидејќи не успеа да ги исполни роковите за усвојување на реформската агенда, а тие пари беа пренасочени кон други земји во регионот.

Властите во БиХ не беа во можност да се договорат за план за реформи речиси две години, бидејќи ентитетите и кантоните се расправаат за јурисдикциите, законите и реформите во неколку сектори, како што се образованието, социјалната политика и пазарот на трудот. Владата, исто така, дискутира за новиот закон за државниот суд и обвинителство, како и за Уставниот суд на БиХ.

БиХ планираше да користи пари од ЕУ за да ги заврши работите на паневропскиот Коридор 5Ц, кој би го поврзал хрватското пристаниште Плоче со Будимпешта.

Планирана е и модернизација на железничката мрежа, а номинирани се и важни енергетски проекти и реконструкција на преносната мрежа, како и дигитализација на земјата.

Планот за раст на Европската Унија за Западен Балкан содржи вкупно шест милијарди евра, од кои четири милијарди се меки заеми, додека две милијарди се грантови. Парите од овој фонд се исплаќаат двапати годишно.

Сите проекти од Планот за раст мора да бидат завршени до крајот на 2027 година, и нема да има продолжувања.