Повеќето луѓе користат продолжни кабли без размислување, едноставно приклучуваат во нив различни апарати кои во моментот им се потребни. Сепак, оваа практика може да биде многу опасна и да доведе не само до електрични дефекти, туку и до пожари.

Тоа е особено случај во зимските месеци, кога често се користат електрични греалки, кои бараат многу електрична енергија, а со тоа и го преоптоваруваат продолжениот кабел, доколку се приклучат во него.

Само затоа што продолжениот кабел има простор за неколку апарати, не значи дека е секогаш безбедно или разумно да ги користите сите приклучоци на него. Различните електрични апарати имаат различни барања за напојување, а приклучувањето на неколку апарати за кои е потребно интензивно напојување во истиот продолжен кабел доведува до реален ризик од прегревање, топење и палење на апаратот, па дури и пожар.

Машина за миење садови, фен за коса, пегла и електрични греалки се апарати кои трошат многу електрична енергија. Од друга страна, апаратите кои не бараат висок интензитет на струја како телевизори, компјутери, радија, звучници се подобро прилагодени за продолжните кабли, иако сепак е важно да не се преоптоваруваат приклучоците.

И американските противпожарни служби предупредуваат на опасноста што ја носат продолжните кабли со себе во зимскиот период. Имено, тие тврдат дека најмногу има работа во зимскиот период, поради преоптоварување на продолжните кабли, односно дистрибутери на струја, при користење на електрични радијатори и греалки.

„Доколку мора да користите продолжен кабел за греалки, ве советуваме да набавите таков што може да издржи тешки товари. Исто така, користете го најкраткиот кабел што можете, бидејќи колку е подолг кабелот, толку е помал напонот. Не го намотувајте продолжениот кабел или да го оставате под тепих, тоа ја прави акумулацијата на топлина уште поопасна“, предупредува Ален Крејви, заменик-началник на пожарникарите во градот Олбани, за „Волб“.

Најдобро би било кога ќе купите продолжен кабел, да размислите кои апарати ќе се вклучат таму, да проверите колку потрошувачи има и соодветно да изберете продолжен кабел со соодветна моќност. Секој апарат има декларирана моќност во вати (W), а секој продолжен кабел има означена вредност, односно колку вати може да издржи.