Музичката рок-група „Лет 3“ ќе ја претставува Хрватска со песната „Мама ШЧ“ на годинашното издание на Изборот на песната за Евровизија.

Додека многумина се воодушевени од антивоената порака која ја носи песната на рокерите од Риека, дел од евровизиските фанови бараат нивна дисквалификација бидејќи стихот „малиот беден психопат“ алудира на рускиот претседател Владимир Путин. Тие сметаат дека политиката не треба да биде дел од еден музички настан како што е Изборот на песна за Евровизија.

Хрватскиот медиум „Јутарњи лист“ стапи во контакт со Британската радиодифузна корпорација („Би-би-си“), која е организатор на годинашното издание на Евровизија, и побара нивен став за евентуалната дисквалификација на хрватската песна.

„Изборот на песна за Евровизија е семејно шоу и Европскиот радиодифузен сојуз (ЕБУ) ќе очекува сите земји-учеснички да се погрижат нивните делегации да го имаат предвид тоа. Особено ако станува збор за голотија, сексуална конотација и, општо, провокативност.

Дополнително, правилата на Евровизија налагаат сите натпреварувачи да се придржуваат до вредностите на Евровизија и ЕБУ – тие не смеат да споделуваат никакви отворени политички ставови или други мислења кои се во спротивност од вредностите на Евровизија. Тоа вклучува забрана на какви било политички изјави на избраните уметници во секој момент – од националниот избор, па сè до изведбата на Евровизија“, велат од „Би-би-си“.

Годинашното издание на Евровизија ќе се одржи од 9 до 13 мај во Ливерпул, Велика Британија.

Минатогодишен победник на Евровизија беше украинската група „Калуш Оркестра“, кои се искачија на првото место со песната „Стефанија“.

Кога музиката ја среќава политиката: Контроверзни моменти на Евровизија, настанот кој ја обедини Европа