Со безмилосни ракетирања на Харков, Киев, Мариупол и други украински градови, како и со активирање на уште повеќе моторизирани единици, руските сили вчера ја засилија воената инвазија врз Украина.

Главната цел на зајакнатата офанзива, според украинскиот претседател Володимир Зеленски, е главниот град Киев. Американската компанија „Максар“ објави сателитски снимки од огромна колона руски воени возила, долга повеќе од 60 километри, како продира од североисток кон Киев.

– За непријателот Киев е главната цел. Ние не им дозволивме да ја пробијат одбраната на главниот град, а тие испратија саботери. Сите ќе ги неутрализираме – изјави претседателот Зеленски.

Артилериски гранати и ракети од системот „град“ вчера со часови го разорувале Харков, при што според локалните власти загинале „десетици цивили“. Светот го обиколи снимка на силна експлозија на проектил во самиот центар на градот, при што била разурната административна зграда.

– Варварски руски ракетни напади врз централниот плоштад Слобода и станбените области на Харков. Путин не може да ја скрши Украина. Од бес, тој врши повеќе воени злосторства убивајќи невини цивили. Светот може и мора да направи повеќе. Зголемете го притисокот, целосно изолирајте ја Русија – порача министерот за надворешни работи Дмитро Кулеба на Твитер, споделувајќи ја снимката од експлозијата.

Воено злосторство

Претседателот Зеленски оцени дека „Русите многу добро знаеле каде пукаат“ и нападите врз Харков ги оцени како „воено злосторство“.

– Руските сили денеска брутално го гранатираа Харков. Ова е воено злосторство. Мирно место, мирни граѓани. Без воени објекти. Ова е намерно уништување луѓе. Поради ова злосторство, дефинитивно ќе се оди пред Меѓународниот суд на правдата. Ова е кршење на сите конвенции. Никој во светот нема да ви прости што убивте мирни Украинци – порача Зеленски.

Тој уште еднаш побара помош од светот за да се запре „злото, вооружено со ракети, бомби и артилерија“.

– Злото мора економски да се уништи. Мора да покажеме дека човештвото е способно да се заштити себеси – изјави Зеленски.

Неговиот советник Михаило Подолјак оцени дека руските сили намерно гранатираат градови вклучувајќи населени реони и цивилна инфраструктура за да прошират страв меѓу Украинците.

– Маските паднаа. Русија активно гранатира градски центри, стрелаат проектили и ракети врз населени и административни реони. Целта на Русија е јасна, да создаде масовна паника, цивилни жртви и да ја уништи инфраструктурата. Украина чесно се брани – изјави Подолјак.

Регионалниот управник Олег Синегубов изјави дека ракети од системот „град“ и наведувани проектили ги гаѓале центарот и населени региони на Харков, но истакна дека одбраната „се држи“.

– Таквите напади се геноцид врз украинскиот народ, воено злосторство против цивилна популација – изјави Синегубов.

Напади врз Мариупол и Херсон

Олекиј Арестович, советник на претседателот Зеленски, изјави дека освен Харков, жестоко бил гранатиран и јужниот град Мариупол, како и дека руските инвазиски сили настојуваат целосно да ги опсадат Харков и Киев. Арестович вчера изутрината изјави дека „ситуацијата сѐ уште е под контрола на украинските сили“.

Руската армија е „пред портите“ на украинскиот град Херсон, на југот на земјата, изјави  градоначалникот Игор Коликаев.

– На влезовите во Херсон руската армија постави контролни пунктови. Тешко е да се каже како ќе се развива ситуацијата. Херсон ќе се спротивстави! – објави Коликаев на Фејсбук.

Тој ги повика жителите да останат мирни и внимателни и да не излегуваат за време на полициски час.

– Не водете агресивни разговори со никого и не предизвикувајте конфликти. Ова не е битка, ова е војна, а војната се добива со разумни постапки и студени глави – изјави Коликаев.

Русија објави дека спроведува „специјална операција“ во Украина, која не предвидува напади врз цивилни цели ниту окупација на соседната земја, со цел „да ги уништи воените капацитети“ и „нацистите“ во соседната земја.

Министерот за одбрана Сергеј Шојгу вчера изјави дека воената операција во Украина ќе продолжи „сѐ додека не бидат исполнети зацртаните цели“, односно „да се заштити Русија од заканите создадени од Западот“.

Користени и вакуумски бомби?

Руските сили напредуваат кон Киев и од исток. Украински медиуми јавија дека 70 војници биле убиени при ракетен напад врз воена база во Охтирка, град помеѓу Харков и Киев. Регионалниот управник Дмитро Живицкиј објави снимка од разурната зграда и објави дека многу војници од двете страни, како и цивили, загинале во битка за контрола на градот.

Реакциите на снимката беа контрадикторни. Според некои извештаи базата била разурната од балистички проектил „искендер“, а според други, војниците биле убиени со термобарско оружје, односно со озлогласената „вакуумска бомба“, која е забранета поради ужасното убиствено дејство. Бомбата е дизајнирана да создава посилен детонаторски удар, но воедно и го вшмукува кислородот и распрскува гориво. Таквото дејство ги разнесува белите дробови и внатрешните органи, што предизвикува бавна и болна смрт.

– Ако навистина била користена вакуумска бомба, тоа е воено злосторство – објави Белата куќа.

Не се потврдени ни извештаите дека руските сили при инвазијата употребиле и касетни бомби, чие користење исто така претставува воено злосторство поради тоа што од нив претежно страдаат цивили.

Белорусија се приклучи на инвазијата

Белоруски сили навлегле во Украина во регионот на градот Чернихив, со што Минск и официјално ѝ се придружи на Москва во инвазијата, иако до вчера изутрината ја отфрлаше таквата можност.

Колона од 33 белоруски возила биле забележани во регионот на Чернихив, североисточно од Киев. Во градот бил исклучен сигналот за комуникација.

Столтенберг: НАТО сѐ уште нема да возврати

Генералниот секретар на НАТО Јенс Столтенберг вчера ја повика Русија да ја запре инвазијата врз Украина и да ги повлече сите свои сили. Тој додаде дека членки на НАТО испраќаат оружје и воена опрема во Украина, но и дека Алијансата нема да испрати војници и борбени авиони во одбрана на Киев, зашто не сака директно да се вклучи во конфликтот.

– Рускиот напад е целосно неприфатлив и е овозможен од Белорусија. НАТО е одбранбен сојуз и ние не сакаме конфликт со Русија. Русија мора итно да ја запре војната, да ги повлече своите трупи од Украина и со добра волја да се вклучи во дипломатските напори – изјави Столтенберг.

Убиени 136 цивили, вклучувајќи и 13 деца

Од почетокот на руската воена инвазија врз Украина биле убиени најмалку 136 цивили, вклучувајќи и 13 деца, а повеќе од 400 луѓе се ранети, оцени Канцеларијата на ОН за човекови права.

Претставничката Лиз Тросел изјави дека реалниот број на загинати е многу поголем.

Лавров: Украина може да добие нуклеарно оружје

Шефот на руската дипломатија Сергеј Лавров ги обвини властите во Киев дека настојуваат да добијат нуклеарно оружје и истакна дека Русија настојува да го спречи тоа.

– Украина сѐ уште има советски технологии и носачи за такви оружја. Не можеме да не одговориме на таквата реална закана – порача Лавров во снимена изјава на состанокот на Конференцијата за разоружување во Женева.

Лавров, исто така, на западните земји им порача да не настојуваат да градат воени капацитети во која било од поранешните членки на Советскиот Сојуз, вклучувајќи ги и прибалтичките земји Естонија, Летонија и Литванија, кои се членки на НАТО.

За Москва, според Лавров, е неприфатливо и тоа што некои европски земји на својата територија имаат распоредено американско нуклеарно оружје.

ОН: Повеќе од половина милион бегалци

Во соседните земји на Украина до вчера пристигнале повеќе од половина милион бегалци од Украина и нивниот број се зголемува од час во час, изјави Филипо Гранди, високиот комесар на ОН за бегалци (УНХЦР), пред Советот за безбедност на Обединетите нации.

Гранди вели дека во својата 40-годишна кариера не видел толку „неверојатно брз растечки егзодус на луѓе“.

– Повеќе од 280.000 луѓе избегаа во Полска. Уште 94.000 се во Унгарија, речиси 40.000 се во Молдавија, 34.000 во Романија, 30.000 во Словачка и десетици илјади во други европски земји. Свесни сме и дека значителен број заминале во Руската Федерација – изјави Гранди.