Многубројните неправилности во трошењето на државните пари минуваат без реакција од надлежните институции, а многу договори за големи и скапи државни проекти, како што е ЕКСПО 2027, имаат посебни процедури и не се целосно достапни за јавноста. Тоа се дел од проблемите кои се посочени од учесниците на дебатата организирана од Транспарентност Србија, објави Н1. Една од главните теми на дебатата беше ЕКСПО 2027 и големите инвестиции кои ги најавува државата, а кои се одвиваат со недоволна транспарентност.

„Ќе видиме колку јавни набавки ќе бидат „ослободени“, по посебна постапка. Тоа сè уште не го покажува статистиката“, оценија експертите. Тие сметаат дека тоа „можеби било предизборен проект на политичка партија и коалиција, но никако не е програма на ниту еден орган на српската држава, колку и да создава впечаток дека е“.

„Имаме банери, слики, видеоматеријали на веб-страницата на Владата на Србија, нешто што изгледа прилично убаво, што станува популарно и секој разумен човек од Србија или од странство би помислил дека тоа е некоја развојна програма на Република Србија. Потоа бараме од истата Влада да ни даде документ, не сликички, туку документ од програмата „Скок во иднината“, а Владата ќе ни одговори дека не постои“, објаснија експертите.

Колку се поголеми проектите и претставувани како „национален интерес“, толку се помали механизмите за контрола на трошењето на јавните средства, што е српски парадокс. „Од една страна имаме меѓудржавни договори, посебни закони, разни толкувања или отворени прекршувања на процедури преку кои се реализираат најважните проекти, а од друга страна се случува некој да биде уапсен за набавка на обични канцелариски материјали и некоја ситна работа“, сметаат експертите.