Лондонските гробишта Хајгејт имаат план да заработат од симпатизерите на Карл Маркс. Расчистен е теренот околу неговиот гроб, на кој на поклонение доаѓаат илјадници комунисти и следбеници, и обележани се нови парцели, но оние што ќе се решат вечното почивалиште да им биде до авторот на „Капиталот“ ќе мора да издвојат по 25.000 фунти.

Гробиштата со 53.000 парцели, во кои се погребени 173.000 покојници, конечно добија финансиска поддршка за реновирање и проширување – 100.000 фунти издвоени од фондот на Националната лотарија. Таму се погребани Џорџ Елиот, Мајкл Фарадеј, Даглас Адамс и Џорџ Мајкл, но најголем интерес привлекува гробот на Карл Маркс.

Јан Дангавел, директорот на гробиштата, тврди дека новите парцели се неопходни за да се задржи статусот на туристичка актракција.

– Таму сѐ уште има живот, каде што почиваат многу луѓе, уште повеќе доаѓаат да ги посетат – објаснува Дангавел.

Тој вели дека прво ќе биде обележан просторот токму околу гробот и споменикот на Карл Маркс, за да се добие капитал за понатамошно реновирање. Пред плочата, на која е и името на неговата сопруга Џени фон Вест, речиси постојано има букети, но неколку пати гробот бил оштетен од вандали. Во 1970 година таму експлодира рачно изработена бомба, која откорна дел од бистата на Маркс, а во 2019 година плочата беше скршена со удар од чекан и вандализирана со црвена боја.