Околу 600 дечиња од осумте основни училишта на територија на Општина Кисела Вода, кои годинава за првпат ќе седнат во училишните клупи ќе добијат ранче, тетратки и сè што им е потребно за да го започнат своето образовно патување.

Проектот што за првпат го започнавме токму кај нас, денес е пример што се прошири речиси низ цела Македонија. Го креиравме со цел да им дадеме вистинска поддршка на семејствата. Првиот училишен ден е посебен момент, исполнет со радост, возбуда и гордост и за децата, но и за родителите – вели градоначалникот Орце Ѓорѓиевски.

Според него, првиот училишен ден не треба да остане во сеќавање по финансиските грижи.

Затоа, ги известувам сите родители дека нема потреба да купуваат ранци и прибор. Нема никакви критериуми, ниту административни процедури – оваа мерка важи за сите наши првачиња – вели Ѓорѓиевски.