Судењето за корупција против поранешниот премиер на Албанија, Салји Бериша, лидер на опозициската Демократска партија, кое требаше да започне денеска пред Специјалниот суд за корупција и организиран криминал, е одложено за септември, пренесува Топ ченел.

Поранешниот претседател денеска не се појави на суд, објаснувајќи им на локалните медиуми дека ќе го застапуваат неговите адвокати.

Штом започна рочиштето, адвокатите побараа разрешување на судиите и го обвинија судот за „недостаток на независност“.

Рочиштето беше одложено и презакажано за септември, но, не беше даден точен датум.

Покрај Бериша (80), неговиот зет и уште три лица ќе бидат изведени пред судот, кој ги разгледува случаите во кои се вклучени високи функционери и политичари.

Во октомври 2023 година, обвинителите отворија истрага против Бериша за наводна злоупотреба на својата позиција за да му помогне на својот зет да приватизира јавно земјиште за изградба на 17 станбени згради во Тирана.

Во септември 2024 година, Бериша беше официјално обвинет за корупција во врска со оваа зделка со недвижнини. Тој ги отфрли обвинувањата, опишувајќи ги како политичка репресија нарачана од премиерот и лидер на сега владејачката Социјалистичка партија, Еди Рама.

Денеска, Бериша се јави во обвинителството, што е негова обврска секоја втора недела, но рече дека нема да оди на суд каде што ќе го застапуваат неговите адвокати.

Бериша беше премиер од 2005 до 2013 година, а од 1992 до 1997 година беше претседател на Албанија. На парламентарните избори во 2024 година, тој беше избран за пратеник. Поради неговата наводна вмешаност во корупција, на Бериша и членовите на неговото семејство им беше забранет влез во САД и Велика Британија.

Корупцијата е главен проблем на Албанија од падот на комунистичкиот режим во 1990 година.

И поранешниот претседател Иљир Мета и членовите на опозициската коалиција на Бериша беа испитани за обвинувања за корупција. Мета, исто така, рече дека обвинувањата биле политички мотивирани.