Белоруските системи за воздушна одбрана соборија неколку дронови кои во текот на ноќта влегоа во воздушниот простор на земјата, објави денес началникот на Генералштабот на Белорусија, Павел Муравејко.

„За време на ноќната размена на напади со дронови меѓу Руската Федерација и Украина, дежурните сили и средствата за воздушна одбрана на Република Белорусија постојано ги следеа дронови кои го изгубија курсот поради ефектите од средствата за електронско војување“, рече тој.

Тој додаде дека синоќа Полска ја информирала белоруската страна за приближувањето на неидентификувани летала од територијата на Украина и дека белоруските сили над нивната територија уништиле дел од заскитаните дронови, пренесува ТАСС.

„Размената на информации за состојбата во воздухот е важна компонента за обезбедување безбедност во регионот како целина и придонесува за воспоставување мерки за градење доверба и зајакнување на безбедноста“, рече тој.

Муравејко истакна дека Белорусија ќе продолжи да ги спроведува своите обврски во рамките на размената на информации за воздушната ситуација со Полска и балтичките земји, велејќи дека Минск веќе ги доставил информациите до Варшава и Вилнус.

Полските власти претходно објавија дека утрово собориле неколку руски беспилотни летала што го нападнале полскиот воздушен простор, а дека остатоците од еден биле пронајдени во близина на Лублин.