Белоруски опозициски активист, уапсен откако неговиот лет на „Рајанер“ принудно слета во Минск, е осуден на осум години затвор. Роман Протасевич беше извлечен од неговиот лет и уапсен под обвинение за поттикнување немири во мај 2021 година, пишува „Би-Би-Си“.

Во четвртокот, регионалниот суд во Минск го прогласи за виновен за серија прекршоци поврзани со неговата работа како уредник во опозициски медиум. Белорускиот државен медиум „Белта“ објави дека тој ќе ја одлежи казната во казнена колонија.

Меѓу обвиненијата за кои му се судеше на Протасевич беа организирање масовни немири, повикување на санкции против Белорусија, создавање или водење на екстремистичка група и заговор за преземање на власта.

Протасевич летал од Грција за Литванија во мај 2021 година кога белоруската контрола на летање ненадејно го пренасочи летот кон Минск, тврдејќи дека има закана за бомба. Тој беше извлечен од авионот и уапсен, заедно со неговата девојка, руската државјанка Софија Сапега.

Апсењата предизвикаа меѓународни противења и доведоа до воведување санкции на ЕУ против белорускиот лидер Александар Лукашенко. Западните земји ја обвинија Белорусија за киднапирање на авионот на „Рајанер“ под изговор за закана за бомба.

Во мај 2022 година Софија Сапега беше осудена на шест години затвор за поттикнување раздор. До ноември 2020 година, Протасевич работеше како уредник на опозицискиот канал „Некста“ на апликацијата за пораки „Телеграм“.