Претседателот на Белорусија, Александар Лукашенко, денес изјави дека системите за воздушна одбрана на земјата собориле некои од беспилотните летала што летале во правец на Полска и дека Минск навремено ја предупредил полската страна.

„Видовме каде летаат беспилотните летала. Соборивме сè што можевме да уништиме, но неколку останаа. Веднаш ја информиравме Полска. Што добивме? Како дивјаци, тие создаваат тензии од никаде“, рече Лукашенко на состанокот со претставникот на Белорусија во ОН, Валентин Рибаков, додавајќи дека Варшава се обидува да ја ескалира ситуацијата, пренесува агенцијата Белта.

Лукашенко изјави дека Белорусија не сака војна ниту затворање на границите, но исто така истакна дека Минск мора да реагира „кога ќе се соочи со свршен чин“.

Полска во среда пријави најмалку 19 неовластени упади на руски беспилотни летала, од кои неколку беа уништени, и рече дека беспилотните летала влегле во земјата од Белорусија.

На барање на Полска, НАТО го активираше Член 4 од Северноатлантскиот договор за да започне консултации меѓу земјите-членки на Алијансата во врска со нарушувањето на полскиот воздушен простор од страна на беспилотни летала.