Фудбалската репрезентација на Англија се мачеше во текот на целото Европско првенство, но на крајот стигна до финалето. Сепак, исто како и пред три години, Англичаните не го направија последниот чекор. Овој пат Шпанија успеа да ја освои титулата.

Црвената „фурија“ по четврти пат се искачи на континенталниот трон, а Англичаните имаат сериозна дилема – дали Герет Саутгејт е човекот кој може да го врати фудбалот дома?

Новинарите веќе почнаа да дебатираат за неговиот статус на клупата по последниот судиски свиреж на Еуро 2024.

Една од најголемите ѕвезди во англиската селекција, играчот на Реал Мадрид, Џуд Белингам, смета дека Саутгејт заслужил почит.

– Сè зависи од Фудбалската асоцијација и од тоа што ќе одлучи селекторот. Немам ништо друго освен огромна почит за селекторот. Тој ми овозможи да дебитирам за Англија, поради него сега сум тука и поради него се чувствувам како дома во репрезентацијата.

Во последната година нашиот однос достигна ниво многу повисоко од чисто фудбалско. Чувствувам дека можам целосно да му се отворам и мислам дека ова најдобро кажува каков човек е тој. Што и да се случи, јас секогаш ќе го почитувам. Ако остане, тогаш ќе бидам уште порешителен да освојам нешто за него бидејќи тој тоа го заслужува. Понекогаш бројките не лажат и тој е нашиот најуспешен селектор од 1966 година. Што и да одлучи, секогаш ќе ја има мојата почит и мојата љубов – се зборовите на Белингам.