Владата на Црна Гора потпиша договор за финансирање и изградба на втората делница од автопатот Бар-Бољаре, со што официјално започнува нова фаза од еден од клучните инфраструктурни проекти во регионот. Станува збор за делницата од Матешево до Андријевица, која е од стратешко значење не само за Црна Гора, туку и за Србија, бидејќи претставува врска во воспоставувањето на модерен автопатски коридор што ќе го поврзе Белград со јадранскиот брег. Финансискиот пакет вклучува 150 милиони евра грантови од Европската Унија, како и заем од 200 милиони евра од Европската банка за обнова и развој (ЕБОР). Премиерот на Црна Гора нагласи дека изградбата на автопатот е апсолутен приоритет на државата и симбол на интеграцијата со Европската Унија.

„Оваа делница не е само пат, туку симбол на довербата на ЕУ во Црна Гора и доказ дека нашата земја може да реализира големи проекти“, рече Спајиќ.

Европските претставници, исто така, ја истакнаа важноста на проектот. Шефот на делегацијата на ЕУ во Црна Гора, Јохан Сатлер, изјави дека ова е најголемиот грант што Унијата некогаш ѝ го доделила на Црна Гора, додека регионалниот директор на ЕБОР, Матео Коланџели, нагласи дека модерната инфраструктура е предуслов за економски раст и регионална интеграција. Од перспектива на Србија, оваа инвестиција има посебно значење.

Автопатот Бар-Бољаре е природно продолжение на коридорот што води кон Медитеранот преку Белград. Транспортната врска со Црна Гора не е само економска и туристичка придобивка, туку и силен геополитички и национален интерес на Србија, објави Политика.