Беќири: Недостасуват реформите, нема сериозна борба против корупцијата
Недостасуват реформите и нема сериозна борба против корупцијата во државата, изјави професорот по кривично право при универзитетот ФОН, Митасин Беќири, коментирајќи го извештајот на „Транспаренси интернешнл“ зa перцепција на корупцијата.
Препорачано
– Извештајот за корупција има раздвижување, но сето ова е фасада, има уште многу работа, тоа го покажува многу нискиот ранг на Северна Македонија, дури и е и во друштво со некои африкански земји. Затоа, можам да заклучам дека нема реформи и нема сериозна борба против корупцијата, изјави Беќири.
Oпозициските парламентарни политички партии ВМРО-ДПМНЕ и Алијанса за Албанците (АА) сметаат дека се потребни конкретни реформи во борбата против корупцијата. Според нив, потребни се коренити реформи и одлучна борба против криминалот, но додават, дека со СДСМ и ДУИ тоа не е можно.
– Заради корумпираните СДСМ и ДУИ, Македонија е меѓу најкорумпираните држави во Европа, во друштво со земји од Африка. Затоа потребни се брзи предвремени избори и влада која ќе биде насочена реформски и со јасна агенда за борба против корупцијата и криминалот, велат од опозициската ВМРО-ДПМНЕ.
Од Алијанса за Албанците на Зијадин Села велат дека „Транспаренси интернешнал“ потврди дека Северна Македонија е меѓу најкорумпираните земји во светот.
– Транспаренси интернешнал денеска и официјално го потврди тоа што Алијанса за Албанците постојано го предупредуваше. Сегашниот режим е еден од најкорумпираните во светот и во овогодинешното рангирање е рангирана во групата земји како Танзанија, Суринам, Мароко, Гвајана, Етиопија, Колумбија, итн. За да биде иронијата поголема, земјите кои до вчера важеа за најкорумпирани, денес се во многу подобра позиција од нашата земја, додека далеку од Северна Македонија се диктаторските земји како Куба. Оваа состојба има само еден виновник, хибридниот режим кој ги заробил правдата и обвинителството и инсталираше корупција во секоја сфера и институција. Да потсетиме дека во ова рангирање придонесоа пасошите за светските криминалци, ослободувањето на локалните криминалци и затворањето на невините граѓани кои немаат пари да ја купат слободата иако им припаѓа, велат од АА.
