Поранешните англиски репрезентативци и некогашни соиграчи во Манчестер јунајтед, Дејвид Бекам и Гери Невил, официјално го купија фудбалскиот клуб Салфорд Сити, кој моментално се натпреварува во англиската Лига два, четврто по ранг натпреварување во Англија, пренесува „Атлетик“.

Оваа аквизиција е дел од поширок план за развој на клубот, спроведен преку нов инвестициски конзорциум. Конзорциумот, предводен од Бекам и Невил, најави значителни вложувања за унапредување на клубот како на теренот, така и надвор од него.

Инаку, Бекам и Невил веќе беа делумни сопственици на Салфорд, заедно со останатите поранешни ѕвезди на Јунајтед, Ники Бут, Рајан Гигс, Фил Невил и Пол Сколс. Сепак, овие фудбалери неодамна го продадоа својот удел во клубот.

Откако главниот инвеститор Питер Лим се повлече од сопственичката структура во 2024 година, Бекам и Невил интензивно бараа нови партнери со капацитет да го однесат Салфорд на повисоко ниво.

На крајот, соработката се реализира со Деклан Кели, основач на американската консултантска компанија „Консело“.

Бекам и Невил ќе бидат ко-претседатели на управниот одбор на клубот, со јасна цел да изградат стабилна иднина.