Ректорот на Универзитетот на Југоисточна Европа академик Абдулменаф Беџети вели дека трендот е опаѓачки во делот на квалитетот на средното образование.

Тоа како што рече директно го гледаме кај самите средношколци кои се запишуваат во нашата образовна институција, а кои веќе добиле стипенди за образование.

„Тие кои земаат стипендија кои доаѓаат од средното образование речиси 40 % од нив ја губат стипендијата при крајот на првата година. Тие не можат да ја ликвидираат годината и не можат да ја постигнат просечната оценка која е предвидена за стипендија. И тоа се покажува во првата година, која е најлесна базична година. Сето ова покажува дека тие оценки што ги добивале во средното образование не се реални“, вели академик Абдулменаф Беџети.

Треба надлежните органи во државата да се позанимаваат со ова прашање, дополнува тој.

„Од друга страна сето ова јас сум го пренел директно на чинителите на јавните политики, дури во еден мој говор тоа го кажав за што поскоро да се преземе нешто во врска со ова. Имаме две групации на ученици, имаме екстра одлични и недостижни кои после се разбира заминуваат во странство веднаш после студиите и тие тука не остануваат поради ниските плати. Но го немаме тој среден слој кој сме го имале десетици години. Потоа имаме еден дел кој едноставно имаат помалку знаење. И треба со нив да се работи дополнително. Ние сега се водиме со мотото да наша обврска е на секој студент кој што влегува и излегува да достигне знаење и професорите се обврзуваат да држат дополнителни часови. Се надеваме дека сето ова ќе биде ставено на дневен ред кај надлежните оти ваквата ситуација го води општествето во лоша насока“, вели академик Абдулменаф Беџети.

Инаку резултатите од ПИСА тестирањето, спроведено во 2022 година покажуваат дека македонските средношколци се на 61. место според резултатите по математика, а на 71. место по јазична писменост од вкупно 81 држава. Учениците постигнаа 380 поени по природни науки, што ја рангира државата на 68. место во Европа, соопшти Министерството за образование и наука.

Резултатите ги објави Организацијата за европска соработка и развој (ОЕЦД).

Како што велат од Министерството, негативните последици од ковид-пандемијата врз квалитетот на образованието во глобални размери ги потврди и меѓународната ПИСА студија спроведена во 2022 година. Според Министерството, резултатите покажуваат генерално намалување на нивото на јазичната, математичката и научната писменост кај учениците на 15 годишна возраст во речиси сите држави учеснички.

Според ПИСА тестот, македонските средношколци се на 71. место по писменост од вкупно 81 држава