Компанијата „Бауер БГ“ испрати реакција до медиумите во која ги демантира информациите кои ги презентираше Инспекторатот на Град Скопје околу казната за фрлање шут кај новопоставените цевки за идниот скопски колектор во Вардариште.

Претходно, Градскиот инспекторат за животна средина соопшти дека токму компанијата „Бауер БГ“ фрлала шут врз веќе затрупаните цевки од идниот колектор и извести дека таа е казнета со 88.000 евра.

„Фатен е камион како истура поголемо количество на чакал и градежен отпад од друго место врз веќе затрупаните цевки на идниот колектор, иако тоа не е дозволено, а, дополнително, цевките можат и да се оштетат ако се изложат на сополнителна тежина“, велат од градскиот инспекторат за животна средина.

Од компанијата, пак, велат дека ова не е точно.

„Ве известуваме дека ДГТУ БАУЕР БГ ДОО Скопје како општествено одговорна компанија ги демантира информациите изнесени во јавноста во текот на денешниот ден за фрлање шут на јавна површина“, се вели во реакцијата од фирмата.

„Воедно, Ве известуваме дека ДГТУ БАУЕР БГ ДОО Скопје како член конзорциумот GUINTOLI и NGE CONSTRACTING за изградба на главен фекален колектор на Град Скопје и согласно валидната градежна дозвола и Договорот со Министерство за финансии (CFCD) изведува градежни активности во реонот на поранешна депонија Вардариште, каде при ископите за поставување на цевки локално и внатрешно се разнесува и отпад кој произлегува од самата депонија. Напоменуваме дека сите активности се одвиваат согласно договрот и во зона на градежен опфат на изведба на фекалниот колектор“, се додава во соопштението.