До големото дерби меѓу Барселона и Валенсија, кое се игра во рамки на 4. коло од шпанската Ла Лига, остануваат уште три недели. Натпреварот е закажан за 13 или 14 септември, но сè уште не е познато дали реконструкцијата на „Камп Ноу“ ќе биде завршена до тој датум.

Барса се обидува да го испочитува планираниот термин за враќање на реновираниот стадион, но се соочува со административни и логистички пречки. Доколку навреме не добие зелено светло, како алтернатива се разгледува стадионот на Жирона, „Монтиливи“.

Сценариото со Олимпискиот стадион „Монжуик“ е веќе отпаднато, бидејќи на 12 септември таму ќе се одржи концерт на американскиот музичар Пост Мелоун, што значи дека нема доволно време за демонтажа на бината и подготовка на теренот за фудбал.

Ла Лига, пак, останува цврста во ставот, нема да дозволи промена на терминот, ниту пак замена на домаќинството. Така, идејата натпреварот да се одигра на „Местаља“ е целосно отфрлена.

Доколку повторно биде одложено враќањето на „Камп Ноу“, Барселона ќе мора итно да пронајде ново решение за одигрување на дербито. Помалиот стадион „Јохан Кројф“ не е опција, бидејќи има капацитет од само 6.000 седишта, што не ги исполнува минималните барања на Ла Лига.

Од клубот категорично велат дека не се размислува за одигрување на натпреварот без публика, па останува да се види како ситуацијата ќе се развива.