Актуелниот европски шампион Барселона и победникот во Лигата на Европа, Магдебург ќе играат во финалето на Суперглоуб турнирот кој се одржува во Џеда, Саудиска Арабија.

Каталонците без никакви проблеми го совладаа бразилскиот Пињерос со 39:24.
Дилемите околу победникот беа решени уште во првото полувреме, Барселона на стартот поведе со 6:1, а потоа и со 20:11 по што дојде до мало опуштање со кое противникот на одмор замина со минус седум (16:23).

Ракометарите на Барселона рутински го одработија второто полувреме и на крајот славеа со убедливи 39:24. Најпрецизен кај Барселона беше Фабрегас со шест постигнати голови, додека Блаж Јанц и Гомез Абељо дадоа по пет гола.

Претходно, Магдебург во првото полуфинале во возбудлив натпревар го совлада Алборг со 32:30.
Стартот на натпреварот му припадна на Магдебург кој поведе со 9:4, но во финишот од првиот дел Данците успеаја да се вратат во игра и на одмор да заминат со 18:18.

Во вториот дел Алборг беше подобар тим, поведе со 20:22, потоа имаше и три гола предност (21:24), но актуелниот победник во Лигата на Европа во завршницата успеа да направи пресврт и да слави со 32:30. Во тимот на Магдебург блескаше Михаел Дамгард со 11 постигнати голови, додека Магнусон даде седум гола. Во редовите на Алборг се истакнаа Бјорнсен и Јул-Ласен со по пет постигнати голови.