Барселона ќе му понуди нов договор на Рафиња, кој ќе вклучува откупна клаузула значително пониска од очекуваната, и покрај тоа што Бразилецот се етаблираше како еден од најдобрите фудбалери во светот оваа сезона.

Според информациите од шпанското издание „СПОРТ“, Каталонците се во почетна фаза од преговорите со 27-годишниот играч, кој стана клучна фигура во тимот на Ханси Флик. И покрај неговата одлична форма, клубот планира да вклучи клаузула за откуп од само 80 милиони евра – сума што би можела да предизвика гласини за можен иден трансфер.

Барса нуди продолжување на договорот за 1+1 година, бидејќи раководството е претпазливо во врска со потпишувањето долгорочни договори кои сериозно го оптоваруваат буџетот на клубот. Сепак, самиот фудбалер инсистира на загарантирани две години. Исто така, постојат несогласувања во врска со платата, при што агентите на Рафиња бараат подобри финансиски услови. И покрај разликите, разговорите започнаа со желба да се избегнат тензии во иднина.

И додека Барселона се обидува да го задржи крилниот напаѓач, Саудиска Арабија веќе испрати понуда. Ал-Хилал има понуда од 100 милиони евра и четиригодишен договор со вкупна плата од 200 милиони евра.

Оваа сезона, Рафиња е во врвна форма, со 30 голови и 23 асистенции во 49 мечеви во сите натпреварувања.