Фудбалерот на Барселона и полски репрезентативец Роберт Левандовски наскоро би можел да го продолжи договорот со каталонскиот клуб, пренесува шпанскиот весник „Спорт“.

Левандовски минатата година пристигна во Барселона од Баерн, а со шпанскиот гигант има договор до јуни 2026 година. Од доаѓањето во Барселона одигра 56 натпревари, постигна 39 гола и имаше 12 асистенции.

Според шпанските медиуми, платата на полскиот напаѓач ќе се зголемува од сезона во сезона според клаузулата во договорот.

– Барселона во никој случај не сака Левандовски да го напушти клубот како слободен играч. Левандовски е среќен во Барселона, вложи многу напор да дојде овде, а неговата средина е во хармонија со клубот. Најверојатно ќе се размислува за продолжување на договорот за една година. Левандовски ќе го каже последниот збор – пренесува „Спорт“.

Шпанските медиуми пренесуваат дека Барса ќе го продолжи договорот и со холандскиот фудбалер Френки де Јонг.