Шпанскиот фудбалер Пабло Паес Гавира (20), попознат како Гави, го продолжи договорот со својот клуб Барселона до јуни 2030 година, соопшти каталонскиот клуб.

Барселона не може да купува играчи поради прекршување на финансискиот фер-плеј, но очигледно може да го задржи она што е добро во сегашниот состав, со повеќегодишни договори.

По Педри, кој во Барселона е од 2019 година и неодамна го продолжи договорот до 2030 година, истото го направи и Гави.

– Многу сум среќен што го продолжив договорот со клубот на мојот живот и се надевам дека ќе им донесеме многу радост на навивачите оваа сезона – напиша Гави на социјалните мрежи.

Овој млад фудбалер пристигна во младинскиот погон на Барселона пред 10 години, а за првиот тим дебитираше во август 2021 година. За шпанската репрезентација забележа 27 настапи.