Во дербито на турската Супер лига составот на Трабзонспор славеше над Фенербахче со 2:0. За клубот на македонскиот репрезентативец Енис Барди тоа е седма победа сезонава во првенството, додека тимот на Езѓан Алиоски го претрпе третиот пораз.

Моментно на табелата води Фенербахче со 29 бодови, два повеќе од Галатасарај и Истанбул Башакшехир, додека Трабзонспор е на четвртата позиција со 26.

– Среќни сме што триумфиравме. Се обидуваме да победиме на секој натпревар. Многу сме среќни што победивме во таков важен меч. Се бориме на секој натпревар. Знаеме дека ќе биде тешко во борбата за шампионатот, но знајте дека ќе се бориме за врвот – рече Барди по мечот со Фенер.

Сезонава нашиот играч до сега има 21 официјален меч за Трабзонспор, во 10 од нив бил стартер и четири пати се запиша во листата на стрелците.

Барди во следното лигашко коло на 28 декември ќе му гостува на Карагумрук, а еден ден порано Алиоски е домаќин на Хатајспор.