Енис Барди и Леванте веќе два месеци немаат триумф во шпанската Ла Лига поради што влегоа во опасната зона која носи во втората лига. Во 33. коло, Леванте одигра само 2:2 против Еспањол и дојде само на два бода од опасната зона.

На пет кола до крајот, Леванте се наоѓа на 17. позиција на табелата со 34 бодови, само два повеќе од Ваљадолид, кој е во зоната на испаѓање. Сепак, македонскиот репрезентативец е убеден дека неговиот тим и во следната сезона ќе биде дел од Ла Лига.

– Без разлика на сè мислам дека нема место за паника. Леванте е едно големо семејство во кое на сите единствената цел ни е опстанокот во Ла Лига. Среќни сме поради поддршката од навивачите и токму поради нив ќе направиме сè и наредната сезона да играме во Ла Лига. Мислам дека можеме до победа на следниот натпревар – изјави Барди.

Следниот предизвик за Леванте и Барди е веќе в среда кога го пречекуваат Бетис.