Балканот, а со тоа и Македонија е регион во светот кој е ретко полн „магацин“  на милиони парчиња на нелегално оружје.

Токму ова балканско оружје кое е наследство од војните но и бренд од воените индустрии кои профитираат со продажба, неделава за жал се најде во раце на младинци и деца во Србија кои извршија два грозоморни масакри.

Имено, овој проблем со кој се соочува регионот сериозно влијае на безбедноста на повеќе држави од поранешна Југославија и истиот секоја година се нотира во извештаите на меѓународните организации кои се бават со истражувања на оваа тема.

Сепак, сопственоста и поседувањето на оружје пак, значително се разликува низ целиот свет. Повеќе од 175 земји во светот им дозволуваат на своите граѓани да поседуваат огнено оружје, иако повеќето имаат специфични прописи за сопственост, како што е забраната на одредени видови.

Кога станува збор на Балканот и посебно на просторот на некогашната СФРЈ која се распадна после неколку годишни крвави воени судирања, истражувањата покажуваат дека и натаму во приватни раце што легално, а што нелегално има многу од ваквото оружје.

Британскиот Би-Би-Си, анализирајќи ја ваквата ситуација со личната вооруженост на српските граѓани, има напишано дека Србија има дури дури осум пати повеќе вакво оружје во приватни раце во споредба со бројката за Англија, Велс и Шкотска и четири пати повеќе од сознанијата за поседувањњто лично оружје во Северна Ирска, каде 35 години ( до 1998 година) беснееше граѓанска војна.

Многу оружје на Балканот, Македонија во „златна“ средина

Велика Британија, во секој случај, е при дното на европските земји кога станува збор за поседувањето лесно оружје во приватни раце. Франција и Германија со 20 парчиња на 100 лица се пред Британците, но зад некои од нордиските земји. Таа бројка е многу поголема во Финска – 32,4 и во Норвешка– 28,8 парчиња.

Сепак Република Србија е прва во Европа според бројот на огнено, лично оружје што ги имаат нејзините граѓани покажува истражувањето на агенцијата за ваков вид вооружување. Дури 39,2 парчиња на 100 луѓе кои живеат во државата. Во Босна и Херцеговина ваквата бројка изнесува 31, 2 на 100 лица, во Косово 23,8 во Македонија 29,8 во Словенија 15,6 додека во Хрватска 13,7 парчиња лесно оружје на 100 лица.

Во земјава има над 180.000 парчиња регистрирано огнено оружје и проценки за околу пола милион парчиња нелегално

Проблемот со лесното пешадиско вооружување или како се нарекува оружје со мал калибар и лесно вооружување во земјата не е од вчера вели универзитетскиот професор Методи Хаџи Јанев за Слободен печат.

Според него, тоа се провлекува уште од периодот после конфликтот во 2001 година, кога голем дел од вооружувањето остана не запленето.

Дополнително, како што објаснува тој, конверегенцијата на криминалот во изминатиот период го направи своето, особено заради интензивирањето на криумчарењето преку т.н. воспоставени канали на балканската траса на илегални активнсоти, каде се шверцуваат и опиати и разни недозволени материи, посебно марихуана но и синтетички дроги.

– Во склад со последната стратегија за борба со нелегално оружје од 2022 година, илегалната трговија со оружје е идентификувана како сериозен проблем во земјава, поради што ОБСЕ и започна проект за поддршка на властите. Дополнителен проблем е поседувањето на ова оружје кај населението според некои анализи се вели дека некаде од 110.000 до 170.000 граѓани поседуваат над 500.000 парчиња илегално оружје. Се на се како земја во регионот кој е трусно подрачје за овој илегален бизнис, Македонија е во средината по број на илегално оружје каде предначат Србија и Црна Гора – вели Хаџи Јанев.