Балансерот во јавниот сектор не треба да се злоупотребува, вели Ковачевски
Премиерот Димитар Ковачевски денеска изјави дека Балансерот за вработување во јавниот сектор „не треба да се злоупотребува“.
Препорачано
Одговарајќи на новинарски прашања по попладневната прес-конференција во Владата, Ковачевски рече Балансерот е воведен од минатата влада и дека произлегува од Охридскиот договор, но дека низ годините се покажало дека кандидатите се пријавуваат со друга етничка припадност за да се вработат.
„Воведен е од страна на минатата Влада, како алатка и сето тоа произлегува од Охридскиот договор. Балансерот функционира и сега, меѓутоа бројките се сменети врз основа на новиот Попис. Прашањето на злоупотреба е прашање од етничка припадност и во одреден дел законска област, бидејќи се покажало низ минатото дека честопати се случува некој кој на пример е етнички Македонец или Албанец, да се напише како Турчин, што не е етички. Тоа не треба да се злоупотребува“, рече Ковачевски.
Запрашан за коментар околу изјавата на вицепремиерката Славица Грковска, која пред два дена рече дека „балансерот ја надмина својата функција“, премиерот рече дека веројатно и нејзиниот став е ист и дека алудира на тоа да се воведат механизми коишто нема да овозможат злоупотреби.
Вицепремиерката за политики за добро владеење Грковска во вторникот го повтори својот став дека Балансерот како алатка за правична застапеност при вработување во администрацијата веќе ја има надминато својата функција и дека треба да се размисли за нов модел и законски решенија коишто ќе го зголемат квалитетот при вработувањето.
