Во неделата се случи 76. доделување на филмските награди на Британската академија за филм и телевизија – БАФТА. Свечената церемонија се одржа во една од најпрестижните сали во светот – Ројал фестивал хол во Лондон, Велика Британија. Водител на настанот беше англискиот актер Ричард Е. Грант.

Воената драма „All Quiet on the Western Front“, која е филмска адаптација на истоимениот роман на Ерих Марија Ремарк од 1929 година, беше апсолутен победник на вечерта со четиринаесет номинации и седум освоени статуетки, меѓу кои и онаа за најдобар филм и најдобар режисер за Едвард Бергер. Со седумте освоени награди, „All Quiet on the Western Front“ го сруши рекордот на БАФТА за најмногу награди од филм кој не е на англиски јазик.

Филмот „The Banshees of Inisherin“, кој раскажува за крајот на едно машко пријателство на оддалечен ирски остров, освои четири статуетки – за најдобар британски филм, најдобро оригинално сценарио, најдобар актер во споредна улога за Бери Киган и најдобра актерка во споредна улога за Кери Кондон.

Остин Батлер е големо и, пред сè, позитивно изненадување во годинашната сезона на награди. Младиот и талентиран актер, кој ја одигра главната улога во филмот за Елвис Присли – „Elvis“, ја освои наградата за најдобар актер во главна улога. Овој биографски филм, кој е во режија на Баз Лурман, освои уште три статуетки – најдобра костимографија, најдобар кастинг и најдобра шминка.

Што се однесува до наградата за најдобра актерка во главна улога, еминентната актерка Кејт Бланшет ја освои престижната статуетка за нејзината улога во психолошката драма „Tár“, што ја прави апсолутен фаворит за добитник на истата награда и на годинашните филмски награди Оскар.

Според голем број филмофили, тоа што комедијата „Everything Everywhere All at Once“ освои само една статуетка беше вистинско изненадување на годинашните БАФТА награди. Приказната за кинеската иселеничка, која е затекната во луда авантура, ја освои наградата за најдобра монтажа.

Документарниот филм „Navalny“, кој раскажува за животот на затворениот руски опозициски лидер Алексеј Навални, беше прогласен за најдобар во својата категорија.

Сосема очекувано, „Pinocchio“ на режисерот Гиљермо Дел Торо беше прогласен за најдобар анимиран филм.

Победниците во сите категории можете да го прочитате тука.