Стопанската комора на Македонија бара одговорност од Регулаторната комисија за енергетика за давањето лиценци на трговците со струја кои ги оставија на цедило компаниите во екот на најголемата енергетска криза и еднострано им ги прекинаа договорите. Претседателот Бранко Азески е дециден дека одговорност мора да има, бидејќи компаниите мораа да се снаоѓаат на отворениот пазар и да плаќаат енормно високи цени за мегаватчас. Претходно во извештајот на државната ревизија, беше констатирано дека сумата од 5.000 евра, не е доволна за некој да добие лиценца и да може да тргува со електрична енергија. Фактичката состојба според ревизијата е дека се остава простор да не може или да има проблеми при наплатата на евентуалните штети кои би се направиле во енергетскиот сектор. Ревизорите предлагаат измени во Законот за енергетика со кои основачкиот капитал за оваа намена би се зголемил.

-Си формираа фирми за 5.000 евра, склучија договори, па преку ноќ ги откажаа. Ова мора да престане. Компаниите беа изиграни, струја се влечеше од ЕНЦОЕ, па целиот цех повторно го плативме ние. Правната држава ќе профункционира некогаш и ќе тужиме, оти два пати бевме насамарени – додаде Азески. Според него, мора да се смени и моделот на субвенционирање и не може да се помагаат само малите и средни претпријатија.

-Не смееме повторно да се доведеме во ситуација, помош да добијат само малите и средни фирми, кога се знае дека големите компании ја влечат македонската економија, произведуваат и извезуваат. По платите, струјата е втората најголема ставка кога се во прашање трошоците на компаниите. Затоа нема да зборуваме за енергетиката само пред грејната сезона, туку секојдневно – посочи Азески, кој побара поддршка од сите големи компании за покренување на прашањето за одговорност.

Иако според ревизорскиот извештај, МЕПСО отпишал долг од 14 милиони евра кон трговците со струја, министерот за економија Крешник Бектеши, минатата недела рече дека информациите биле погрешно пренесени во јавноста и дека долгот не е отпишан. Според Бектеши, укажувањата дека овие пари МЕПСО нема да ги наплати, биле прејудицирани. Претходно и од МЕПСО излегоа со соопштение дека долгот не бил отишан, туку средствата биле резервирани.

Инаку, лани за да се обезбеди доволно струја, откако трговците ги откажаа договорите, се влечеше струја од европската мрежа, која на МЕПСО и беше фактурирани според хупекс плус 50 отсто пенали. Вкупниот долг изнесуваше 15 милиони евра, а беа наплатени само нешто повеќе од 1 милион евра.