Ако сакаме младите да останат во Македонија и да имаат перспектива, мора да им дадеме образование што води кон вработување, порачува Бранко Азески, претседател на СКСМ. Според него, младите мора да бидат подготвени за пазарот што постои, а не за оној од пред 20 години.

– Дуалното образование не е крајната цел, туку почеток на едно ново разбирање: дека образованието мора да зборува на јазикот на економијата. А Комората е тука за да биде преведувач, посредник и двигател на тој процес. Во спротивно, и понатаму ќе бидеме сведоци на одливот на мозоци на Запад. Македонија нема иднина без да го спречи овој процес. Затоа Комората од денес е во нова офанзива да ја убеди Владата со заедничка платформа да направат пресврт како кај дуалното образование – порачува Азески.

Според извештајот на Светска банка за 2023 година, Македонија е рангирана на 23 место, во група од 25 земји, со најмногу емигранти. Дури 40 отсто од високообразовниот кадар во последните 10 години ја има напуштено државата и според индексот на Глобал економи е рангирана на 5-то место од 41 европска држава.

– Но, причината за иселувањето не е само од економска природа, туку и поради лошите можности за вработување, невработеноста од 24 отсто кај младите до 29 години, младите се иселуваат за поквалитетно здравство, социјална заштита и поквалитетен начин на живот. Одамна си заминаа песимистите, тука останаа само оптимистите. Да направиме обид да ги задржиме овде – поентира Азески.

Инаку, Стопанската комора во 2017 година ја презеде иницијативата за воведување дуално образование. Почна како пилот-проект со само две квалификации – електротехника и машинство. Денес сликата е сосема поинаква: овој модел се применува на 78 квалификации во рамките на 14 сектори, со активно учество на 560 компании и 69 средни стручни училишта. Имаме импресивна бројка од 259 дуални паралелки во училиштата.